– Во Преспа живеат Македонци, со македонски јазик, идентитет, култура, традиции. Без разлика на некои странски влијанија, за нас, тука живеат Македонци! Тие се заедница која е додадена вредност во мозаикот на културните, историските, етнографските и јазичните вредности на нашите простори, порача албанскиот министер за одбрана Нико Пелеши од изборниот собир одржан во селото Туминец.

Пелеши, кој е координатор за локалните избори за округот Корча, вети дека коалицијата на владеачката Социјалистичка партија и македонската партија – Македонска алијанса за европска интеграција ќе продолжи со цел развој на општина Пустец.

– Посебно сакам да нагласам и да кажам дека, високо го цениме залагањето на МАЕИ во заштитата на македонскиот идентитет во Албанија. Нашата соработка е долгорочна, а со поддршка на владата, покрај досега реализираните проекти и оние во тек на реализација, веќе се усвоени и други проекти со кои Пустец ќе го добие потребниот лик на развиена туристичка дестинација, – додаде Пелеши.

Пелеши искажа убеденост дека, Пали Колефски, како кандидат на Социјалистичката партија, чија кандидатура е поддржана од сите претставници на ограноците на МАЕИ во Албанија, по вторпат ќе ја добие довербата, бидејќи ја заслужува.

Ние ќе работиме повеќе за ова благословено подрачје со Пали Колефски. Денеска, општината е на услуга на нејзините граѓани. Пали е одличен менаџер кој знае да го сослуша секого и да размислува за секое барање и забелешка. Тој во изминатите четири години направи многу за оваа општина. Многу работи ќе бидат подобрени. Гарантираме еднаков третман и можност за секој жител. Со Социјалистичката партија во долгорочен сојуз со МАЕИ и со Пали Колефски на чело на општината, ќе продолжиме со брзо темпо. Само напред за да го надокнадиме изгубеното време, порача Пелеши.

За успешноста на Колефски зборуваше и лидерот на МАЕИ, Васил Стерјовски, повикувајќи ги жителите, на 14 мај да го заокружат бројот 2 (Пали Колефски) за градоначалник и број 29 за советничката листа на МАЕИ.

– Не треба многу да зборувам за менаџерската способност на Колефски, зашто вие самите сте сведоци на неговите успеси. ќе го спомнам најгорливиот проблем, што со негово и наше залагање, а со поддршка на владата беше надминат – изградбата на водоводот во општината! Ние, како партија, ветивме, и заедно со општината тоа ќе го реализираме: Ќе подигнеме спомен обележје во Туминец посветен на сите борци за слободата на ова село, од Илинденскиот период и Втората светска војна, што е повеќегодишно барање на Македонците од Туминец, – рече Стерјовски.

Пред присутните се обрати и Колефски, кој спомна повеќе реализирани проекти, а најави и нови.

– Заедно можеме многу, наша Преспа ќе ја направиме вистински туристички рај. Во овој сектор веќе е одобрен проект поддржан од германската КФ банка, а во соработка со владата на премиерот Еди Рама. Ве повикувам заедно да продолжиме во спроведувањето на нови проекти за доброто на сите нас. Само напред, никако назад, – порача меѓу другото Колефски.

Кампањата за неделните избори во Албанија, на кои се избира новата локална власт во 61 општина завршува утре на полноќ.