Овој викенд, во Загреб, на Зрињевац, традиционално се представија националните заедници кои живееат и работат во Загреб. Македонското национално малцинство во Град Загреб, подржано од членовите на Советот на МНМ ГЗ, наставничките по македонски јазик, МКД „Охридски бисер“ и бројните Македонци ја представија наставата по македонски јазик и култура, своите препознатливи јадења и пијалоци и традиционалните народни носии и музика.

Во сабота, како дел од настанот, се одржа и настава по македонски јазик и култура. Припадниците на македонското национално малцинство своето уставно право на образование според моделот „Ц“ го остваруваат во основните училишта „Никола Тесла“ и „Август Харамбашиќ“ (40 ученици) и во „Прва гимназија“ во Загреб (12 ученици).

Наставниците по македонски јазик и култура Деспина Белчовска Велинска и Ивана Брезовец со своите ученици одржаа кратки презентации за изучувањето на македонскиот јазик пред минувачите преку бои, бројки, зборови и кратки честитки со што го приближија македонскиот јазик во социокултуролошки контекст и до идните ученици како значаен елемент за развој и зачувување на македонскиот јазик како дел од нашиот идентитет. Во Музичкиот павилјон учениците настапија со рецитирање на „Дај ми – на ти“ и читање на поезијата од македонските поети.

Во неделата, Советот на македонското национално малцинство на Град Загреб, со поддршка на своите советници, Македонците во Загреб и во соработка со МКД „Бисер Охридски“ со гордост ги претставија своите препознатливи елементи на културниот и национален идентитет – препознатливи македонски јадења, музика и народни носии. Во Музичкиот павилјон настапија членовите на МКД со македонски антологиски песни: „Ој Вардаре Македонски“, „Јовано, Јованке“ и „Не си го продај Кољо чифлигот“.

Оваа традиционална манифестација уште еднаш покажа дека посебните права и слободи за припадниците на националните малцинства се неделив дел од демократскиот систем на Република Хрватска.