По двегодишна пауза поради пандемијата со корона вирусот македонските фудбалски клубови од Австралија се сретнаа на традиционалниот фудбалски турнир “Масо куп“.

Изминатиот викенд осумнаесет македонски фудбалски клубови заедно со 34 екипи од цела Австралија одиграа 65 натпревари пред три илјади гледачи на традиционалниот турнир “Масо куп“, одржан во Њукасл, во австралиската сојузна држава Нов Јужен Велс.

Турнирот беше поделен на четири категории, а победници се Алтона меџик, Њукасл санс и Рокдејл Илинден во машка конкуренција, како и Бродмедоу меџик во женска конкуренција.

Алтона меџик од Мелбурн во наредните 12 месеци ќе го чува победничкиот пехар на Масо купот, откако го совлада Џелонг Македонија со 1-0 во Њукасл.

Пехарот на победничката екипа го предаде македонската амбасадорка во Австралија, Билјана Стефановска-Сековска.

Натпреварувањето на екипите од македонската заедница во Австралија беше организирано за првпат во 2008 година. Прв победник беше Алтона Меџик Вардар, а Рокдејл Илинден е рекордер со осум освоени пехари.