Македонска заедница во Канада
Прослава на василица во „Св. Недела“ во Ејџекс
![Прослава на василица во „Св. Недела“ во Ејџекс Прослава на василица во „Св. Недела“ во Ејџекс](https://maticanaiselenici.com/wp-content/uploads/2023/01/323227539_1849226018777995_6643851156387297642_n-e1673948480734.jpg)
17.01.2023
Во неделата на 15 јануари напладне во организација на Македонската православна црковна општина „Света Недела“ во Ејџекс, се одржа традиционалниот ручек и забава во чест на Василица – Македонската православна нова година.
По свечениот ручек подготвен во црковната кујна, раководена од една од најдобрите професионални готвачки, Марија Ангелевска, во банкетната сала отпочна и забавниот дел.
На почетокот, благословот за среќна нова православна година го пренесе парохискиот свештеник отец Александар Зашов, а по него свое обраќање имаше претседателот на црковната управа и еден од најактивните претседатели во македонската заедница во Канада, Славе Бунтески. Бунтески во својот говор изрази огромна благодарност до сите свои соработници, парохијаните, неговата сопруга Зора, за поддршката и истрајноста во сите цели и планови и им посака оваа година на сите да им донесе многу повеќе здравје и среќа.
Претседателката на женската секција при црковната општина, Милица Попоска, не ја криеше својата радост што за Василица повторно како некогаш се собраа верниците, црквата живее и ќе напредува. Златната паричка од продадените мазници подарена од Дафина Христова ја доби Ристана Младенова.
Во зававниот дел настапија музичките уметници Стив Штуревски, Соња и Оливер Бенд, Стојне Николова и Бобан Мојсоски.
За потсетување, на 28-ми јануари МПЦО “Света Недела“ организира донаторска вечер за помош и обнова на манастирот Света Марена, во Туминец, Мала Преспа. Добредојдени се сите Македонци.