Спортски спектакл впо арената „Борис Трајковски“
Легендите на македонскиот ракомет против репрезентацијата на Македонија
![Легендите на македонскиот ракомет против репрезентацијата на Македонија Легендите на македонскиот ракомет против репрезентацијата на Македонија](https://maticanaiselenici.com/wp-content/uploads/2022/12/321613865_485801123623587_4827319746146133082_n-e1672396947756.jpg)
30.12.2022
На 3.јануари во арената „Борис Трајковски“ ќе се случи спортски спектакл. Ќе играат легендите на македонскиот ракомет, против репрезентацијата на Македонија која ќе се подготвува за настап на Светското првенство.
„Овој несекојдневен спортски спектакл, има за цел да им оддаде почит на сите ракометари и ракометни работници кои оставиле свој личен придонес во колективниот учинок на ракометот како најпопуларен македонски спорт. Актуелниот национален состав за претстојното Светско првенство во ракомет, кое ќе се одвива од 11 до 29 јануари 2023 во Полска/Шведска – ќе биде противничкиот табор на ветераните.
Покрај квалитетен ракомет, за време на настанот се предвидува и квалитетна забавна програма модерирана од Сашко Коцев, во која ќе настапат македонските уметници: Дац и Александар, Кики, Некст тајм и Меморија.
Приходите од продажбата на билетите, Ракометната федерација на Македонија ќе ги донира на „СОС Детско село“ од Скопје, која организација во моментов поддржува повеќе од 394 деца и млади кои се без родители и родителска грижа или се во ризик да ги изгубат своите родители. Повеќе од 20 години СОС Детско село функционира на принцип на донации, благодарение на кои се грижи за децата кои се под нивна надлежност“, најави на својата официјална страна Ракометната федерација на Македонија .
До денес, своето присуство на теренот го потврдиле: Алушевски Стевче, Ангелов Петар, Ангеловски Бранко, Ѓоргоновски Горан, Даскаловски Златко, Димовски Ванчо, Јовиќ Александар, Кузмановски Горан, Јоновски Ацо, Лазаров Кирил, Лазаров Филип, Макаловски Гоце, Марковски Велко, Миркуловски Филип, Митков Влатко, Мојсовски Златко, Мојсовски Наумче, Недановски Владо, Ристовски Борко, Стоилов Митко, Стоилов Столе и Стојановиќ Раде, како и добро познатите селектори Илија Темелковски и Звонко Шундовски.